«Se sé in t'el ponte longo e ve fermé co ze che 'l sole cale verso sera maravegiai sicuro restaré de védare 'na roba bela e vera.
Voltéve, e ben vardé verso ponente che vedaré un spetacolo grandioso tuti resté incantai sicuramente de lumare un tramonto gran famoso,
co' vieri in aqua e anche issài sui pali e bateléti in mezo, là incastrai; un spetacolo a ze che no à de uguali che certo no avaré conossuo mai!
Al giorno, el sole indore barche e vele su l'aqua azura a fa tanto sprendore, mondo colori in sièlo, nuvole bele che fa dasséno ben gioire 'l cuore!
Un'oasi de pase certamente, dove ghe ze silensio e poesia; le vedé 'ste belesse solamente su la laguna de la Ciósa mia!
(Luigi Bozzato, "Tramonto in laguna" da "Spassisando per Ciósa", Tipografia Regionale Veneta 1981)
Nessun commento:
Posta un commento
COMMENTA CON RISPETTO, NON IN ANONIMATO